("¡Asina! Sentimientos en castúo")

Esparcíos por to'l mundo

revolando su bandera,

ergullosos como naide

de sé nacíos d'esta tierra,

asín son los extremeños

qu'en la sangre de sus venas

llevan el barro balego

que moldeó su nacencia.

Cuando'l verano achicharra

con ese sol sin concencia

que tuesta los labrantíos

y arresolana las jesas;

cuando las uvas se tiñen

del coló que da su siembra

y los galgos s'estirancan

a la sombra e las jigueras;

en el fuego de la tarde,

ronroneando la siesta,

ni los lagartos s'asoman

simismaos bajo las piedras,

las ovispas y las moscas

dando güertas se marean,

en el barro d'un regato

los cochinos se revuelcan

y en los juncos de las charcas

ni las ranas gurrapean.

Sólo s'escucha'l silbío

de trenes que vién de güerta

y el rugío e los motores

de colorinas viajeras

atiborrás d'extremeños

que se jueron con la pena

d'abandoná sus raíces

en este lao de la Tierra.

Los jatillos que llevaron

con sus cuatro pretenencias

y las cajas de cartón

reatás con soga de trenza

l'han cambiäo por maletas

y bolsos de piel de fieras

con nombres raros, mu raros,

qu'icen qu'están pa la selva.

Llevan jorrando to'l año

los duros y las pesetas

pa estrujar entre sus brazos

a la madre, a la agüela,

al padre, agüelo y hermanos,

sobrinos y parentela;

y a Curro, el de la tasca,

qu'ha engalanao la taberna

pa que to'l pueblo s'arrime

a bebé un chato en la feria.

¡La Feria del Emigrante!

¡Achuchones y verbena!

¡Qu'alegría cuando bajan

del tren o de la viajera

con su mirá mu perdía

en el tiempo y en la tierra!

Sus ojos son manantíos

d'esas lágrimas traviesas

que brillan como canchales

bajo la lus extremeña.

("¡Asina! Sentimientos en castúo")
Javier Feijóo